يامغلاك )))) للشاعر جمعة نايم الكعبي

جديرٍ بالهوى قلبك ويشرّفني أعيش وياك
وفيٍ للوفى دومك وتملك قلبي الوافي


يا كبرك في وسط عيني ويا قدرك ويا مغلاك
إذا شبّهتك بعيني ... ترى ما ضنتي كافي


يا زينك يوم تتبسّم ويا طيبك ويا محلاك
أخذْت من الزهَر لونك على ذاك الحلا ظافي


وتعجبني إذا تزعل ويعجبني أكون إرضاك
و أنا أدري حتّى لو تزعل بطيبة قلبك الصافي


خيالي دايمٍ يسرح أحطْ إيدي على يمناك
أبرحل بك مع أحلامي وصوت الغيث هتّافي


أبَخفيك بوسط روحي أبَبعد عن عيون عداك
لزوم ظروفنا تحكم نعيش بعالمٍ خافي


أنا ما همّني غيرك ولا حد يالغلا يسواك
أناني لو بغيت تقول ... نعَم في حبّك أنشافي


وغلاة عيونك وقلبك وروحك مستحيل أنساك
أنا ما أعيش من دونك ولو عانيت لكْلافي


أسيرك كان ما تدري أسيرك والذي سوّاك
حلاة الأسر بيدينكْ ورمش عيونك إلحافي






جمعة بن نايم